चिलिमे-त्रिशूली २२० केभी प्रसारण लाइन निर्माण अन्तिम चरणमा पुगेको छ। त्रिशूली नदी करिडोर र यसको सहायक नदीहरूमा निर्माणाधीन तथा प्रस्तावित जलविद्युत् आयोजनाहरूबाट उत्पादित विद्युतलाई राष्ट्रिय ग्रिडमा जोड्न यो प्रसारण लाइन महत्त्वपूर्ण मानिएको छ।
रसुवाको आमाछोदिङमो गाउँपालिकास्थित थम्बुचेमा रहेको चिलिमे हब सबस्टेशनदेखि नुवाकोटको किस्पाङ गाउँपालिकास्थित पहिरेबेँसीमा रहेको त्रिशूली थ्री बी हब सबस्टेशनसम्मको २८ किलोमिटर प्रसारण लाइनको अन्तिम चरणका कामहरू भइरहेका छन्। दशैं पर्वअघि प्रसारण लाइन सञ्चालनमा ल्याउने योजना रहेको छ।
चिलिमे-त्रिशूली २२० केभी प्रसारण लाइन परियोजना अन्तर्गत २२०/१३२/३३ केभी चिलिमे हब र त्रिशूली थ्री बी हब सबस्टेशनको निर्माण सम्पन्न भइसकेको छ। ७६ टावरमध्ये ७५ टावर निर्माण सम्पन्न भइसकेको र बाँकी रहेको एक टावरको काम अन्तिम चरणमा पुगेको छ।
२८ किलोमिटर प्रसारण लाइनमध्ये ५ किलोमिटरमा तार जडानको काम मात्र बाँकी रहेको छ। २०० कामदारहरू टावर र तार जडानमा खटिएका छन्।
नेपाल विद्युत् प्राधिकरण (एनईए) का कार्यकारी निर्देशक कुलमान घिसिङ र प्रसारण निर्देशनालयका उपकार्यकारी निर्देशक दिर्घायु कुमार श्रेष्ठ नेतृत्वको उच्चस्तरीय टोलीले शनिबार निर्माण कार्यको स्थलगत अनुगमन गरेको थियो। टोलीले दशैं पर्वअघि नै प्रसारण लाइन सम्पन्न गर्ने अन्तिम मिति तोकेको छ।
यस प्रसारण लाइनबाट चिलिमे हाइड्रोइलेक्ट्रिसिटी कम्पनीले विकास गरेका ११० मेगावाटको रसुवागढी र ४२.५ मेगावाटको सञ्जेन जलविद्युत् आयोजनाबाट उत्पादित विद्युतलाई जोड्ने योजना छ। दुवै आयोजना निर्माण सम्पन्न भइसकेको र उत्पादनको चरणमा रहेका छन्। यस कारणले पनि प्रसारण लाइन निर्माणलाई चाँडो पूरा गर्न एनईएमा दबाब रहेको छ।
